Cezar
Vinetu' kaj Frakasman'
(Morala kanto en gurda maniero)
Vinetu', la indiĝeno,
ŝanceliĝas jam kun peno;
eĉ ne helpas Manituo
post la fajroakva ĝuo.
Post sobriĝ' la ruĝa viro
iĝas ree kavaliro.
Vi pri tio do ne ridu
kaj mokemon vian bridu!
Frakasman', la blanka frato,
bruas per la fritopato.
Kun botelo da viskio
li kantegas: Dijo Mijo!
Post sobriĝ' la blanka siro
iĝas ree kavaliro.
Vi pri tio do ne ridu
kaj mokemon vian bridu!
Ambaŭ estas forta paro,
nur ne nun dum tiu faro
pro soifo alkohola
en la ret' de l' blonda Lola.
Post sobriĝo ĉiu viro
iĝas ree kavaliro.
Vi pri tio do ne ridu
kaj mokemon vian bridu!
Rimarkoj: Ili estas romanfiguroj de Karl May, konataj pro la filmoj. Unu el la multaj romanoj de li estas tradukita en Esperanton. (Cez)